Kryeministri i vendit, Ramush Haradinaj ka thënë se pjesë e marrëveshjes së ratifikuar në Kuvend është edhe raporti i Komisionit dhe deklarata e dy presidentëve që i tashmë i obligon të bëjnë korrektimet e nevojshme në drejtim të Çakorrit dhe Kullës, shkruan arbresh.info.

Kryeministri Haradinaj përmes një postimi në profilin e tij në facebook ka shkruar se përkrahja e Komisionit për formimin e trupës së përbashkët me Malin e Zi është jetike në procesin e korrigjimeve të vijës kufitare sipas ligjit të ratifikuar dje.

Ky është postimi i plotë i kryeministrit Haradinaj:

“Puna e palodhshme dhe e mbështetur në fakte e Komisionit për Shënimin dhe Mirëmbajtjen e Kufirit Shtetëror, argumentet e të cilëve ndihmuan shumë lidershipin politik për të marrë vendime të duhura shtetërore, e veçmas puna e tyre i ka ndihmuar deputetët e Kuvendit të Kosovës, të cilët me ratifikimin e Marrëveshjes i dhanë përgjigje një çështjeje që kishte mbetur pezull plot tre vjet.

Pjesë e marrëveshjes së ratifikuar është edhe raporti i Komisionit dhe deklarata e dy presidentëve që na obligon të bëjmë korrektimet e nevojshme në drejtim të Çakorrit dhe Kullës. Përkrahja e Komisionit për formimin e trupës së përbashkët me Malin e Zi është jetike në procesin e korrigjimeve të vijës kufitare sipas ligjit të ratifikuar dje”, ka shkruar Haradinaj në facebook.